Наврӯз ҷаҳонӣ шуд, то бод чунин бодо!

- Дар асоси дастуру супоришҳои Вазири корҳои дохилӣ генерал-полковники милитсия Раҳимзода Рамазон Ҳамро, роҳбарияти Академияи ВКД тасмим гирифтаанд, ки баҳри табақаҳои ниёзманди ҷомеа, алалхусус собиқадорони Академия ва фарзандони кормандони мақомоти корҳои дохилӣ, ки ҳангоми иҷрои вазифаи хизматӣ ҷони азизи хешро баҳри ваҳдату суботи комил нисор кардаанд, кумак намоянд.
Ногуфта намонад, ки саҳми устодону шогирдони Академия низ дар таҷлили ҷашни Наврӯз назаррас мебошад. Ба хотири гиромидошти ҷашни ҷаҳонии Наврӯз, омодагиҳои назаррас ва ба ҷо овардани суннатҳои наврӯзӣ, аз ҷумла гузаронидани чорабиниҳои фарҳангӣ-фароғатӣ, семинару машваратҳо, озмунҳо ва мусобиқаҳои варзишӣ дар саросари ҷумҳурӣ, аз ҷумла дар Академияи ВКД ба нақша гирифта шуда, онҳо дастҷамъона амалӣ карда мешаванд, ки ин аст маҳз сипосгузорӣ ба суннатҳои наврӯзӣ, - иброз дошт сардори Академияи ВКД, номзади илмҳои ҳуқуқшиносӣ, полковники милитсия Насуриён Пулод Асадулло зимни таҷлили ботантанаи ин ҷашн.
Лозим ба ёдоварист, ки рӯзи 19 марти соли равон дар ин муассисаи таҳсилоти олии касбии ҷумҳурӣ бо иштироки роҳбарият ва ҳайати шахсии Академияи ВКД, меҳмонону собиқадорон, омӯзгорон, курсантону шунавандагон ин ҷашни аҷдодӣ бо шукӯҳу шаҳомати хосса таҷлил гардид.
Нахуст, сардори Академияи ВКД полковники милитсия Пулод Насуриён ҳамкасбону ҳамватанонро ба ифтихори ин ҷашни фархунда, ки яке аз рамзҳои худшиносиву худогоҳии миллии мо, мардуми Тоҷикистон ва умуман, инсоният мебошад, сидқан табрик гуфт.
- Воқеан, Наврӯз дар миёни аҳли башар ягона ҷашнест, ки оину суннатҳои зиндагисози он аз гузаштаҳои ниҳоят дури таърихӣ то ба имрӯз боқӣ монда, эътибору манзалати худро ҳифз намудааст, ки онро миллату халқҳои дигар ҳамчун дастоварди беназири фарҳанги ориёӣ пазируфта, бо шукӯҳу шаҳомати хоса таҷлил менамоянд.
Наврӯз ва дигар ҷашнҳои миллии мо - Сада, Тиргон ва Меҳргон падидаҳои нодире мебошанд, ки дар тӯли таърихи чандин ҳазорсолаи халқамон ҳамчун омилҳои пояндагии мо - тоҷикон нақши барҷаста бозидаанд.
Барои миллати сарбаланди тоҷик боиси ифтихор аст, ки бо ибтикори Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, Ассамблеяи генералии СММ 26 феврали соли 2010 қароре қабул кард, ки ҷашни бостонии нажоди ориёӣ - Наврӯз ҳамчун нишони тамаддуни ҷаҳонӣ, умумимиллӣ эълон гардид, - афзуд баромадкунанда.
Ба андешаи сардори ин муассисаи олии таълимӣ, мо - тоҷикон ва умуман, мардумони кишварҳои ҳавзаи Наврӯз ин мероси гаронбаҳои ниёгонро аз ҳаводиси рӯзгору тӯфонҳои шадиди таърих ҳифз намудем, гиромӣ доштем ва ба он шукӯҳу ҷилои тоза бахшидем.
Наврӯз дар масири мавҷудияти хеш чандин ҳодиса ва рӯйдодҳои таърихиро аз сар гузаронида, бо мураккабтарин равандҳои замон рӯ ба рӯ гардидааст. Аммо рӯҳи шикастнопазири миллати тоҷик нагузошт, ки мақому манзалат ва меҳру муҳаббати он аз дилу андешаи мардум дур гардад.
Мавсуф дар идома баён дошт, ки Истиқлолияти давлатӣ, ки ягона ормони миллии мо - тоҷикон мебошад, дар ҳама самтҳои ҳаёти ҷамъиятӣ, алалхусус дар шинохти анъанаҳои суннатӣ, аз ҷумла таҷлили Наврӯзи ҷаҳонӣ шукӯҳу таҷаллои тоза додааст. Бинобар ин, мо - тоҷикон, ин ҷашнро ҳамчун мероси муқаддастарини ниёгон ва ҷашни покиву зебоӣ ва баҳору эҳё дар фазои Истиқлолу Ваҳдат бо шукргузорӣ ва ифтихори миллӣ таҷлил менамоем.
Возеҳ аст, ки имрӯз инсоният дар марҳилаи хеле ҳассосу мураккаби ҷаҳонишавӣ қарор дорад, ки нисбат ба ҳар вақти дигар ба арзишҳои волои фарҳангӣ, суннатҳои зиндагисози маънавӣ, ахлоқи ҳамида, меҳру рафоқат, ҳамдиливу ҳамкорӣ ва сулҳу оромӣ ниёзи бештар дорад.
Дар чунин шароит Наврӯз чун тантанаи сулҳу оромӣ ва омили муҳимтарини ҳамгироии фарҳангҳо ва суннату оинҳо, моро боз ҳам ба сӯи рӯзгори бехушуннат, сулҳу субот ва таъмини зиндагии орому осуда раҳнамоӣ мекунад. Ҷашни Наврӯз хусусиятҳои ба худ хосро доро мебошад. Мардум дар таҷлили ин ҷашн кӯшиш ба харҷ медиҳанд, ки тамоми суннатҳои наврӯзиро гиромӣ дошта, онҳоро ҳамчун арзиши гаронмояи инсонӣ ба оламиён муаррифӣ намоянд.
Ҳамзамон, дар барномаи идона ҳунармандони Академия ва сарояндагону ҳаҷвнигорони ҷумҳурӣ курсантон бо маҳорати баланди шеърхониву сурудхонӣ дар якҷоягӣ бо ба ҷашн шукӯҳи дигар бахшиданд.
Дар идома озмуни «Беҳтарин хони наврӯзӣ» доир гардида, дар саҳни Академия равзаҳои махсус оид ба таърихи Наврӯз, таому бозиҳои миллӣ ва дастранҷи ҳунарҳои мардумӣ, расму русум ва оинҳои наврӯзӣ, чорабиниҳои варзишӣ ва фарҳангӣ манзури ҳозирин гардонида шуданд. Ҳамин тавр, дар чорабинии идона аз тарафи шуъбаву кафедра ва факултетҳо хаймаҳои наврӯзӣ ороста шуда, пухтани суманак, намоиши ҳунарҳои мардумӣ, дастурхони идона ва хӯрокҳои наврӯзӣ, ҳафтсину ҳафтшин намоиш дода шуд.

Наврӯз ҶОБИРОВ,
Тоҷиддин ЛАТИПОВ